Nafarroa, arragoa, argiaren pausaleku
haizearen ibiltoki zabal, hesirik gabea,
Nafarroa, arragoa, sua eta ura,
kondaira urratu baten oihartzun oihukatua,
amets bat baino gehiago,
ez oparotasun osoa,
nahiaren eta ezinaren
borroka toki ekaitzez betea. (bis)
Nafarroa, arragoa, mahats eta gari,
maitasun eta gorroto, gezur eta egia gurea,
Nafarroa, arragoa,
lur beroen sabel emankorra
eta goiko mendi hotzen
mendetako loa. (bis)
Nafarroa, Nafarroa, zuhur eta eroa,
lurrik maitatuena, hormarik gabe utzitako etxea,
erreka gardenen negarrez
ibai lodietara
isurtzen ari den
odol bustikorraren iturri bizia.
Nafarroa, arragoa, izen bat eta oinarri
eta oinaze, eta bidean zure bila ibiltzea,
pinudiek usaintzen dituzten
harrixigorrezko bidetan gora.
O Nafarroa,
Nafarroa betikoa (bis)